ஈருலக சஞ்சாரம்

திறைகடல்  தாண்டி  திரவியம்  தேடுபவர்  கோடி
தூரமொரு  பொருட்டின்றி  வாழ்ந்தனர் கவிப்பாடி
திசைக்கொரு தேசமென தாயகம் விடுத்தனர்
தனம்பெருக்கவென பெரும்பான்மையினர்
தம்மக்கட் படிப்பிற்கென பலப்பேர்
தேசாதி தேசங்கள் வலம்வர சிலர்
தன்னார்வமுடனோ தள்ளப்பட்டோ தவித்தனர்
தற்கால சடுதியில் கலந்துவிட்ட புதுவுலகம்
தனதானவர்களின் நினைவிலேயே கரைந்து மறு உலகம்
தணல்போல் உவகையில் மிதக்கையில் தெரிவதில்லை
திடுக்கிடும் துக்கசேதியில் துவண்டிடும் இயலாமை
தடுமாறும் அயல்நாட்டாரின் நெஞ்சோரம்
ஈருலக சஞ்சாரம்!

-- கி.வினோத்

மேதகு தினங்கள்!

தற்போதைய நிலையில்

தன்னலமில்லா உழைப்பும்

தியாகமிகும் கடமையும்

செலுத்தும் வீரர்களான

காவலரும், மருத்துவரும்,

செவிலியரும், அரசுப்பணியாளரும்,

தெருவியாபாரியும், கடைக்காரரும்,

இன்னபிற மனிதத் தெய்வங்களும்

உண்மையான உழைப்பாளிகள்!

மனிதத்தின் காப்பான்கள்!

மே தினம் மட்டுமல்லாமல்

இவர்களின் சேவைக் காலமெல்லாம்

மேதகு தினங்கள்!

---கி.வினோத்

ஒரு புறம் பாயும் காதல் நதி

உனது புதுப்புது முகங்களில் உள்ளம் கரைத்து காதல் வளர்த்தவன்

ஏனோ நேற்றைய முகத்தின் ரேகைக்கண்டு

இதயத்தில் விரிசல் கொண்டனன்

சுயமதிப்பீடு செய்து விம்முகின்றாய்

உனது உயர்மதிப்பிற்கு சான்றிதழ் தேடித் தோற்கின்றாய்

சிற்சில உறவுகளின் பிரதிபலிப்பு பொய்ப்பின்

மறுதலித்து முகம் வாடுகின்றாய்

அன்பளிப்புடன் சிறிதாய் எதிர்பார்ப்பும் சேர்ப்பது போல்

காணிக்கையுடன் பக்தியில் சுயநல வேண்டுதல் போல்

காதலிலும் கைமாறு கேட்கிறாய் தப்பில்லை!

ஒரே திசையில் பாயும் நதி பயணமாய் 

ஒரே வழியில் பிராவாகமெடுக்கும் அன்பு 

கரைதட்டி கவலைக்கொண்டு வெதும்பினால்

என்று சேர்வது கடலை?

தனக்கென வேட்கை இல்லாவிடினும் 

எனக்கெனவொரு வழித்துணையாகவாது வா

இம்மியளவும் எதிர்பார்ப்பற்ற 

நாய்குட்டியின் விசுவாசத்துடன்

நீயும் நானும் ஓடலாம்!!

— கி. வினோத்

16/12/2019

சிறுத்தைகளின் சரித்திரம்

 காதலர் தினமன்று கருப்புதினமாக்கிய கோழை வதம். Feb 14, 2019 அன்று நடந்த வன்முறை தாக்குதலில் இன்னுயிர் நீத்த 44 இந்திய வீரர்களுக்கு வீர வணக்கமும் அஞ்சலியும் இந்தக்  கவிதை - கி.வினோத்
#புல்வாமா #pulwama 

படையலுக்கு நேர்ந்துவிடும் பலியாடுகள் இல்லை நீவிர் 
படைகளுக்கு வலு சேர்க்கும் சிறுத்தைகள் அல்லவா நீவிர்!

வீரமுடன் எல்லை காப்பதும் போர்புரிவதும்  தினசரி அலுவல்
விவேகமுடன் கலகம் உட்பூசல் கையாள்வது பகுதி நேரம்
வேட்கையுடன் தீவிரவாதம் தகர்ப்பது  பட்டியலிட்ட பணி 
பாசமுடன் பேரிடர் வதைக்கும் மக்கள் மீட்பது உமது மாண்பு
நேசமுடன் மனை மக்கள்விட்டு தனித்து வாடுவதும் பண்பு
பெருமையுடன் பணியிலும் பனியிலும் உயிர் தியாகம் சிறப்பு


வரம்புகள் பிரித்து விதிமுறையுடன் தாக்குபவன் தேவலை
நரம்புகளின்றி கொடும்நியதி வகுக்கும் கோழைகளின் வேலை
பயமேதுமின்றி பகட்டாய் ஆளும் அரசோ அதன் எந்திரமோ
பாதுகாப்பு குறைவை வெட்கமின்றி கடமையாக்கும் காவலோ
பச்சை துரோகமென உணர்ந்திடாத ஆயுத ஊழல் பேரங்களோ
பக்கத்துணையென நடித்து முதுகினில் குத்தும் பலரை தாங்குவீர்

தம் மண்ணின் மைந்தரை கண்மணிகளாய் காத்திடும்
தங்களுக்கு எம் தந்தையரென பாசம்பாராட்டுவதன்றி என் செய்வது!

குடைச்சல்

எனது மேல் மாடியில்

எலியொன்றின் இடைவிடாத

அலைச்சல்

எனது காதுக்குள் புகுந்து

மண்டை முழுவதும் பரவி

மறு காதுவழி வெளியேறுவதாய்

குடைச்சல்

திமிறும் எலியினை சிறையெடுத்து

தூக்கி வீசி

அமைதி வாழ்வு வாழ ஆசைதான்

அன்றி

அதன் இருக்கை மறந்து

இயல்பாய் நடித்து

சிந்தை செலுத்துகின்றேன்

எங்கோவொரு மூலையில்

எலி வசித்துக் கொண்டுதானிருக்கின்றது

--கி.வினோத்

கலியுக பிரம்மாவே!

நான் நாயெனவும்

தெருதான் எனக்கான வாழ்வியல்

எனவும்

தீர்மானிக்கும் நீ

மனிதனாய் பிறவி எடுத்தும்

மிருக மனதுடனே அலைகின்றாய்

மற்றவனை கீழ்தரமாய் சிருஷ்டிக்கும்

கலியக பிரம்மாவே

உன்னுடனே போகட்டும்!

உன் உதிரத்தில் உதிர்ந்த

இளைய தலைமுறை

சமவெளியில் பயணிக்க

எம்முடன் கைகள் கோர்க்கட்டும்!

--கி.வினோத்

விரைவு ஊர்தி

நூறாயிரம் முறையேனும் நினைத்திருப்பேன்

இது நாள் வரையிலான பயணம்

விரைவு ஊர்தியாய் பறந்தது போலிருக்கும்

எந்தையர் தலைமுறையின் பயணம்

படிப்படியாய் மேலேறிய அனுபவம்

வழி நெடுகிலும் இளைப்பாற நேரமுடன்

உச்சி சேருகையில் ஆத்மார்தமான திருப்தி

எந்தன் தலைமுறையின் பயணமோ

மின் தூக்கியில் மேலேறும் அனுபவம்

வழி தோறும் இரசிக்க நேரமில்லை

உச்சி சேருகையில் ஆயாசமான அயற்ச்சி

மேலிறிருந்து கீழ் நோக்கு கையில்

இலக்கு அல்ல அதை அடைய

பயணிக்கும் பாதைதான் பாடமென புரிகின்றது!

--கி.வினோத்