சன்னல் வழி தெரியும் மரங்கள்
சிறப்பானவைதாம்
எங்கிருந்தாலும்
சூரிய கடிகாரம் போல்
வாழ்வுக் கடிகாரம் இந்த
சன்னல் மரங்கள்
எப்பொழுது பார்த்தாலும்
அன்றைய மனநிலையை
துல்லியமாய் காட்டிடும்
அந்தந்த சூழலுக்கேற்ப
வடிவமைத்துக்கொண்டே
வளர்ந்து வரும்
காணும் கண்களுக்கோ
கவிதையாக உள்புகும்
மரத்தின் நிழற்படம்
என் பிறப்பிடத்தின் சன்னல் மரமும்
என் இருப்பிடத்தின் மரமும்
என் வழியே இணைந்திருக்கும்!
—கி.வினோத்
புகைபடம் ஒரு கால இயந்திரம்
பதிவிட்ட நேரத்திற்கு
பின்னோக்கி கடத்தி
நினைவுகளை நெகிழ செய்யும்
புதிதாக பிடித்த படமோ
தற்பொழுதை உறைய வைத்து
பின்னொரு தினத்து
புத்துணர்விற்கு பதியனிடும்
இருப்பவர் இல்லாதவர்
முறுவலுடனோ முறைப்புடனோ
புகைப்படங்கள் என்றும்
மகிழ்வான தருணங்களைதான்
பிரதிபலிக்கும்
பல்வேறு மணிக்கூறுகளை
சிறைபிடித்த சந்தோசத்தில்
சுவற்றில் சிரிக்கின்றன
என் வீட்டு புகைப்படங்கள்!
-- கி.வினோத்
மெழுகாய் அன்புநெகிழ்ந்து உருகி
வெள்ளிபோல் காதல்கசிந்து இருகி
பதினாறு தொட்டது
எம் திருமணத்தின் அகவை!
ஒரே நாளில் விருட்சமாகிடவில்லை
ஒவ்வொரு வருடமாய் வளர்ந்தது
முட்களும் பூக்களுமாய் மலர்ந்தது!
துயிலா இரவுகளுக்கு விடியலாய் நீயும்
வலியான பகல்களின் அஸ்தமனமாய் நானும்
சமன்செய்யும் வண்டிமாடுகளாய் ஈடுகொடுத்தே
முன் நகரும் தாம்பத்தியம்!
சிறு கவிதையாய் மகளும்
சிறு கதையாய் மகனும்
சங்கமத்தின் இலக்கிய வெளிப்பாடு!
இணைப்பிரியா அன்னப்பறவைகளாய்
தொடுவானம்வரை நீந்திச் செல்வோம்!
-- கி.வினோத்
